رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

الأقوال المستباحة في النقد والصراحـة

بخيت بيومي

الاثنين, 31 أكتوبر 2011 21:39
بقلم: بخيت بيومي

< إلي المجلس الأعلي للقوات المسلحة:
يا ناس يا طيبين
احلفكم بالغاليين
قولولنا واخدين مصر ورايحين
علي فين..؟!

< إلي محمد ابراهيم سليمان اللي كان زمان وزير إسكان:
بيقولك الحاج عبد الصبور
اللي يجيب شهود زور
يركبوه في جهنم حنطور
وفي مزرعة ليمان طره
يقطعوا عنه الميه والنور..!!
< إلي رجال القضاء والمحامين:
مصر الأصالة مصر البسالة
محتاجة العدالة وحراس العدالة
وشجاعة ولادها
خلاصة الرجال والعدالة
وبلاش «...»!!!
< إلي خروف العيد:
المساكين المتلسوعين
من جشع الجزارين
اللي بقالهم سنة
من اللحمة محرومين
في انتظار لحمتك يا حزين..!!
< إلي حزب الوفد:
في زمن الدجل والخبل..!
والكسل والهبل..!
والخلل..!
والملل..!
إنت الأمل.. يا عسل..!!
< الي الكابتن فاروق جعفر المدير الفني لطلائع الجيش:
اللي يعمل علي الزمالك
أبو العريف والحريف
يطلع له في الضلمة
عفاريت بني سويف..!!
< إلي المخرج الكبير أحمد النحاس:
عبقري المستحيلات
في الفيديو والاكشانات
لما بيفنن.. يجنن
ويعمل م الفسيخ شربات..!!
< إلي وزير التضامن الاجتماعي دكتور جودة عبد الخالق:
حقوق الغلابة والمساكين
منهوبة في فساد جمعية المؤلفين
والملحنين
اشكيك لمين
للسيدة زينب واللا لسيدنا الحسين..!!
< إلي محافظ الدقهلية اللواء صلاح الدين المعداوي:
تمثال الكاتب العظيم
انيس منصور
اللي قدام فيلا غيث
م الاهمال بيستغيث..!!
< إلي شركة صوت القاهرة للصوتيات والمرئيات:
بعدما هل عليكي الخير
واتحركت عجلة الابداع
في مسيرة التنوير
اتحركوا الدبابير
والذئاب تعوي
والقافلة تسير..!!
< إلي نادي الزمالك:
لا تقول كاني ولا ماني
ولا دكان الزلباني
من أولها يا حلواني
طلع الأهلي ع القمة
ومش حينزل تاني..!!
< إلي الرئيس المخلوع حسني مبارك:
البلد بتقول كلها
احنا بقينا فزورة
عقدتها.. وخربتها
وقعدت علي تلها
وحلها.. انك تحل عنها..!!
< إلي الموزع الموسيقي الممتاز ابراهيم الراديو:
بدال ما كنت تلحن
من الباطن
وترفع من شأن الأقزام
كنت لحنت لميادة الحناوي
وفايزة احمد وأصالة
وصبحت من الملحنين الاعلام..!!
< إلي مصر المحروسة:
بيني وبينك
ربنا يعينك
ع اللي سارقينك واللي ناهبينك
بقولك ايه
ارفعي جبينك ومن المحبوسين فيكي
فتحي عينيك.. !!

----

لبخيت بن بيومي صاحب المساحة