الأقوال المستباحة فى النـقد والصراحة
إلي الحزب الوطني المخلوع
بيقولك الواد ربيع المسروع
ازاي حتبقي من الترشيح ممنوع
وأنت صبيانك زي الجراد والنمل
في المدن والقري والنجوع..!!
إلي السيدة سوزان ثابت مبارك سابقا
قال عمرة قال..
أهم من العمرة المغفرة والاستجابة
في اللي حصل للمظاليم والناس الغلابة..!!
إلي الزعيم جمال عبدالناصر
اللي الجماهير رغم رحيله
لازالت فاكراه
بيعيش مرة ليعيش زعيمًا مدي الحياة..!!
إلي نادي الزمالك
بيقولك المعلم الياس
تاجر النحاس
لو عايز تحتفل بالمئوية
وتفرح الزملكاوية وكل الناس
اوعي تسيب لإنبي الكاس..!!
إلي المخرج الراحل عمنا صلاح السقا
بعد منك لا فيه مسرح ولا عرايس
ولا حنتيره
والمسرح صبح ع الحصيرة
وحلقوا زيرو لعرايس الليلة الكبيرة..!!
إلي أنس الفقي وأسامة الشيخ أصحاب ماسبيرو سابقًا
السجن كتر خيره
لولا إن انتم اتحبستم
كنتوا خلاص حتبيعوا النيل
والكورنيش وتبيعوا كمان مبني ماسبيرو..!!
إلي الفريق سامي عنان رئيس أركان حرب القوات المسلحة
قوللي يا أمل الشعب ونصيره
يا اللي تفكيرك من تفكيره
الموضوع كترت فوازيره
لحد امته المخلوع حيفضل
رايح جاي ع المحكمة نايم في سريره..!!؟
إلي الأغنية الوطنية
الوطنية كانت زمان
عملوا منها الشعرا أجمل الأغاني
لكن دي الوقتي الوطنية
عندها أنيميا وفقر دم في المعاني..!!
إلي الإعلامي مجدي سليمان رئيس شبكة البرنامج العام
الكلام الأهم
والرأي المهم والأعم
تستاهل يا عم
أنك تبقي وتبقي وتبقي
وتبقي رئيس الشبكة الأم..!!
إلي الفقيد معمر القذافي اللي كان رئيس ليبيا
خربت ليبيا يا فالح
حتلعب ماتش الخراب النهائي
مع بشار الأسد
واللا مع علي عبدالله صالح..!!
إلي المطربة الموهوبة ريهام عبدالحكيم
لو كنتي اتخلقتي في عصر الغناء الأولاني..
أيام الموجي وعبدالوهاب وأقطاب الكلام والمعاني
كان بقالك شأن تاني..!!
إلي الرئيس السوري بشار الأسد
حطيت نفسك في ورطة
وسوريا صباحت تورته
واقطع دراعي
لو نابك منها حته
حتخلع امته..!!
إلي حسام وإبراهيم حسن اللي كانوا مدربين النادي الإسماعيلي
علي رأي المعلم عباس
الخطة الكوسة
والتشكيل القلقاس
مش يطلع الإسماعيلي ده يطلع برشلونة
قبل الأوان م الكاس..!!
----------------
لبخيت بن بيومي صاحب المساحة