رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

خناقة بين معارضى ومؤيدى المليونية على "كلنا خالد سعيد"

الصفحه الاخيره

الخميس, 08 سبتمبر 2011 15:20
كتبت – سارة عزو:

فور إعلان صفحة "كلنا خالد سعيد" أمس الأربعاء مشاركتها في مليونية يوم غد الجمعة للمطالبة بتحديد تاريخ محدد لانتخاب رئيس الجمهورية وتسليم السلطة، وإيقاف المحاكمات العسكرية للمدنين، وتعديل قانون الانتخابات الجديد لأنه يتيح فرصة الفوز لأصحاب النفوذ والمال على حد قولهم

ولعدم وجود إجراءات حاسمة للقضاء على ظاهرة البلطجة في الشارع المصري وانعدام الشفافية ، تباينت الآراء بين أعضاء الصفحة البالغ عددهم أكثر من مليون وستمائة ألف عضو حول النزول بجمعة 9 سبتمبر المعروفة إعلامياً بـ"جمعة تصحيح المسار".

بدأ المعارضون لفكرة النزول بالصفحة باتباع الصوت العالي واتخاذ ثقافة تخوين الآخر مساراً لهم، ومنهم العضو تامر أبو الدهب قائلاً:" انزل أنت يا بتاع خالد سعيد الشعب فهم خلاص، ومش نازل أنتم كام؟ انتم رعاع مرتزقة، طظ فيكم وفى أي حد بيفرض رأيه على الشعب"، وأضاف مهاب مصطفى : "أنت نازل عشان تعمل فوضى في البلد، أنت نازل عشان ميبقاش في بلد بقى بعد الفوضى والبلطجة اللي حصلت من الغوغاء في ماتش الأهلي لسه عندك نفس تقول الكلام الخايب اللي انت بتقوله، الأحسن كنت تقول نشكل لجان مرور ونتصدى لبلطجية الميكروبصات، الأحسن تقول نروح المدارس ونعلم الأطفال النظام والمسئولية، واننا نلف على المصانع نقنع العمال تبدأ تشتغل، الأحسن تقول إن التحرير ملهوش مكان لبلطجى ولا مطلب فئوي ".

ورفضت العضوة جيهان خليل النزول

قائلة :" طيب انزل ربنا معاك، إحنا عارفين إنها جمعه لشق الصف ومش هاننزل ومش هنثور عالجيش"، وأضاف نبيل الشامي :" كفاية زهقنا وقرفنا، كفاية دعوات للاعتصام  خلينا نشتغل ومطالبنا ممكن نقدمها مكتوبة للمجلس العسكري وللحكومة مع متابعتها ولكن التركيز يجب أن يكون على الدعوة للعمل فلن تنجح الثورة إلا بالعمل والإنتاج مش بالمليونيات"، وقال محمد الدقي :"انزل يوم 9\9 عشان تهين جيشك انزل وشارك في الخيانة انزل وشارك في الزفة عشان أنت جاهل و أهطل و مابتفهمش، انزل عشان المخططات الخارجية تنجح انزل عشان شوية صعاليق طمعانين في البلد لحساب فكر استعماري جديد، انزل عشان هيا أصلا خربانة".

وأكد محمود المصري على رفضه النزول غداً قائلاً:"مع احترامي ليكم هو أصلاً من الأول الثورة وخده مسار غريب غير كل ثوره ودي ضريبة إن الثورة ليس لها قائد، والأفضل إننا نركز كلنا علي انتخابات الشعب ونساعد إنها تطلع انتخابات نزيه لأقصي الحدود لان المنتخبين دول هما اللي هيختاروا من يضع الدستور، خلينا نركز في الإصلاح والتطوير حتى لا تزور الانتخابات ونحن نفكر بالمظاهرات"، وأضاف علاء حسام :"أنا شايف إن إحنا نصبر كمان أسبوع

ولو ما حصلش حاجة ننزل يوم 16عشان ماحدش يلومنا بعد كدا"، وأضاف محمد سعيد:"نحن ضد المظاهرات المليونية لأنها تؤدى إلى عدم استقرار الوطن، إحنا كرهنا المظاهرات وكل من يشجع عليها".

ومن ناحية أخرى، رحبت مجموعة كبيرة من الأعضاء بالمشاركة في جمعة تصحيح المسار تحت شعار "سلمية سلمية"، ومنهم تامر فؤاد قائلاً:"أنا موافق على الخروج لتعديل المسار ولرفض محاكمات المدنيين أمام محاكم عسكرية"، وأضاف إسلام حسين :"النزول إلى الشارع مهم جدا، لأن الزخم الثوري و الضغط السياسي عامل رئيسي و فعّال لتحقيق مطالب وأهداف الثورة"، وأضافت رحاب تمام:" لازم ننزل و نفضل ننزل لان ببساطة التغييرات بطيئة و شوية شوية الناس هتنسي و ترجع تكبر دماغها تاني".

وقال العضو أيمن متولي :" النزول و التعبير عن الرأي بطريقه حضاريه ده أبسط الحقوق اللي الشهداء دفعوا دمهم عشان تكون عندنا، كمان من حقنا إن كل المسؤولين على كل المستويات زي شرف و طنطاوي و كل وزير يكون عنده كلمه أو اجتماع مع الشعب عشان يجاوب على تساؤلات الناس كل فتره زمنيه مدتها 15 يوم أو حتى شهر على الأكثر"، وأضاف كريم شوقي :" أنا نازل يوم 9-9 مش هضايق حد ومش هاجى على حد أنا مش ها أنزل عشان نفسي، أنا ها أنزل عشان لسه في ناس ماخدتش حقها"، وقال أحمد حسن :" أنا مع المشاركة يوم 9 سبتمبر عشان فعلا في ناس هدفها تخلينا نحس إن الثورة ضاعت ومع تعديل مسار الثورة ولكنى ضد أى مهاجمه للمجلس العسكري لأن البلد من غير الشرطة والجيش يبقى عليه العوض ومنه العوض".

وأخيراً عزيزي القارئ، ما رأيك هل ستشارك غداً في جمعة "تصحيح مسار الثورة" أم سترفض النزول؟

أهم الاخبار