زجّال وشاعر بالمنصورة يطالب شرف بالغناء الملحمي لردع الفتنة

الصفحه الاخيره

الجمعة, 20 مايو 2011 09:18
المنصورة - محمد طاهر :

الشاعر طارق شعبان

أرسل طارق شعبان الشاعر والحاصل علي المركز الأول في الزجل رسالة إلى د.عصام شرف رئيس حكومة الثورة أكد فيها أنه في عهد الثورات والنكبات أيضا كان للشعراء والزجالين دور مهم في توجيه الرسائل الوطنية للشعب المصرى خاصة من هم بسطاء وكانت النتائج دفع الهمم والعزيمة لمواجهة الأزمات .. مشيرا إلى أن نار الفتنة تحتاج للتغني بهذه

القصيدة بعنـــوان (مصرهي الجنة)

شمرت إيدي اتوضا ؛ من ميَّـة النيل

فرشت بساط فضا ؛ من خضره ويَّـا نجيل

لمحت ع النيل

صورة " المدنة " وهى حاضنة " برج " طويل

قلت: والله دا همُ

( القرآن ) مع ( الإنجيل)

***

ودين النبي بتحدى .... أى بلد في الكون

فيها الوطن يتبدى .. على القداس و شهر الصوم

زيك يا مصر يامدا ... ايدك وشبكاهم

" أهلة الرحمن" بتحضن "

الصلبان"

( أجراس) تدق ( آدان )

في حضن " ست الكون "

***

مستحيل .. يامصر ؛ يقطعوا " التوب الجميل "

بتغزله " فاطمة و مريم " على خصرك ؛ من ألف جيل

وهم بيغزلوه .. كانت بلدنا ف فرح

(" فاطمة" بكره ح تتجوز و " مريم " ح تكمل الإكليل )

***

يامصر ياللي ولادك

بيصلوا أدام بابك

إخوات في كل بلادك

( محمود ) أخوه ( حنـــا)

وصَّـى بكده دينا

قال: إن أنا منهم

قال : إنهم مـِنَّـا

يارب قوينا .. واصلح كمان بينا

ولا تشمت أعادينا

ولا تحرمنا م " الجنــة "

 

 

أهم الاخبار