"أبوجلابية" لن يعيش فى جلباب الزمالك

الصفحه الاخيره

الثلاثاء, 05 أبريل 2011 13:32
كتبت ـ هدير احمد


(السيد الاستاذ:ابو جلابية

نطالب بمظاهرات مليونية باستاد القاهرة ومن اهم مطالبها

1-عودة الكرة التى سرقت من الملعب عشان كانت على حساب حسام حسن وكان لسه عليها اقساط

2- تغيير الحكم ووضع كره بيسبول

3-عودة شبك المرمى

4 حد يرجعلى الجلابية عشان اتسرقت.)

هذه المطالب رفعها أحد التعليقات التى جاءت على صفحات الفيس بوك التى دشنت خصيصا لأجل " الراجل أبو جلابية".

وعن أطرف التعليقات التى جاءت على صفحات ما يقرب من 92 صفحة على الفيس بوك لـ" الراجل أبو جلابية" رصدت البوابة الإلكترونية للوفد بعضا منها، نعرض لها فيما يلى :

*خبر عاجل :الراجل اللى لابس جلابيه فى ماتش الزمالك طلع بتاع الشاي والقهوة اللى فى المدرجات ونزل وراء الجمهور يلم منهم الحساب.

* ياجماعه الراجل ابو جلابيه كان بيجري عشان كان فاكر ان فيه فراخ جمعيه بتتوزع ببلاش فى الاستاد .

* خبر عاجل :القذافى يجدد الثقه فى الراجل ابو جلابيه وزير الخارجيه.

*الجرائد تنفي ارتداء الراجل ابو جلابيه للجلابيه و تؤكد انها كانت صورة تعبيرية تعبر عن المصري في عصر الرحرحه.

*حد يعرف ليه الراجل ده نزل الملعب بالجلابية ؟

عشان يعرف العالم كله ان مصر بقت ديمقراطية وأنهم بينزلوا الجمهور الملعب حتى لو كان لابس جلابية.

*قرر صاحب الجلابية بتكوين حزب سياسي أطلق عليه لن أعيش

في جلباب الزمالك.

*نادي الزمالك يقرر تغير الزي الرسمي الي جلابية الموسم القادم.

*القذافى اتهم الراجل انة سرق منة الجلابية بتاعتة وراح بيها الماتش.

*ياترى الراجل ابو جلابية بيفصل عند مين لازم نشكر الترزى اللى فصل وبصراحة عامل له انسيابية فى الحركة ومرونة عالية جدا.

*انباء غير مؤكدة عن تجميد ارصدة الراجل ابو جلابية.

*خبر عاجل : لقد قرر الراجل ابو جلابية التنحي وخلع الجلابية وحيلبس شنكوتي.

*الراجل مش بس بكلمته .. الراجل بصندله و شومته و جلابيته.

*هو نازل يعمل دعايه لشركة جللليب جديده الشاب الجلبي.

*الرسالة رقم 32 من المجلس الأعلي للقوات المسلحة ... حرصا منا على الترابط الإجتماعي والدفء الأسري والنشاط الرياضي لنسيج الشعب المصري لقد قررنا.

تعيين الراجل ابو جلابية اللي نزل ماتش الزمالك رئيس نادي الزمالك.

*على فكره الراجل دا اللي زرع أرض الاستاد عيب اما نتريق عليه.

*لو حسام حسن مشى ممكن نمسك الراجل ابو جلبيه.

*العثور ع فرده شبشب الراجل ابو جلابية ف الأستاد من ساعات قليلة ومازال البحث جاري عن الفردة التانية والجيش يحذر من تداول فردة الشبشب بين المواطنين.

*لنيابة العامة تضع ابو جلابية تحت الأقامة الجبرية و التحفظ علي الشبشب اللي كان لابسة علشان أتضح ان فية مواد مشعة و وزارة الداخلية تعلن عن ضبط اتنين بلاص مش بدودة كان ينوي استخدامها في ترويع التوانسة .....

*عاجل | بعد احداث جماهير الزمالك في مباراه اليوم

المجلس الاعلى للقوات المسلحه اعلن قرار حظر لبس الجلاليب من الساعه 6 الى 12 .. و الله الموفق.

*الخارجية الأمريكية تنصح الراجل ابو جلابية اللي نزل ماتش الزمالك بظبط النفس.

*التلفزيون المصري يقرر عرض مسلسل ( لن اعيش في جلباب ابي) تضامناً مع الراجل ابو جلابيه.

*نظرا لحالة الجرى المستمرة للراجل ابو جلابية داخل الملعب اعلن جهاز الشرطة فى بيان صدر اليوم ان افراد الامن سيتوقفوا عن الجرى وراء الرجل ابو جلابية على ان يستأنف الجرى غدا صباحا وذلك نتيجة لحالة الاعياء الشديدة التى اصابت الافراد وفيما يبدو ان الراجل ابو جلابية يعمل ببطاريات شحن.

*أكد الراجل ابو جلابية انة سيظل يجرى بالملعب بالجلابية حتى الاستجابة لمطالبة.

*يطالب الراجل ابو جلابية الفيفا بتغير الزى الرسمى للمباريات على ان يكون جلابية و شيبشب والا يهدد بمظاهرة المليون جلابية بميدان التحرير.

*لم يستجيب الراجل ابو جلابية للشعب الذى يطالبة بالتنحى عن الجلابية.

*فى تغير ملحوظ فى الاحوال الجوية داخل القاهرة و المحافظات ارجعت هيئة الارصاد الجوية هذه التغيرات الى موجات الجرى السريعة للراجل ابو جلابية مما ادى الى تغير ملحوظ فى الضغط الجوى من منخفض لمرتفع و العكس وافاد رئيس الهيئة ان الجلابية فيما يبدو شفطت كل الهواء.

*يعتصم الراجل ابو جلابية اعتصام كامل بالجلابية تأكيدا على حقة فى لبس الجلابية.

أهم الاخبار