رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين
آخر الأخبار

الشعب يريد أن يعيش سعيدا

الصفحه الاخيره

الأربعاء, 16 مارس 2011 22:01



النصائح العشر للسعادة، كيف تعيش سعيداً؟، 5 خطوات للسعادة،.. إلخ ما نقرأ عن الطريق إلى السعادة التى طالما شغلت بال الناس جميعاً،

وعبر السطور التالية رسالة لأحد القراء يشرح فيها هو الآخر نصائحه لنيل السعادة وبكل بساطة كما وصفها، ننقلها لكم كما أرسلها:


اشتري علبة شوكولاتة مستوردة غالية و كلها.

بص على بنت حلوة و اعرف أنها لو عرفتك كويس أكيد هتحبك.

العب لعبة مالعبتهاش من و أنت صغير.

اعرق و انهج و حس إنك عايش.

اطفي نور أودتك شغل التكييف اسمع أكثر مزيكا بتحبها و اسرح معاها.

بص لأهلك و عرفهم قد إيه بتحبهم.

بص للي تحتك و اعرف قيمة كل حاجة معاك.

بص للي فوقيك و اعرف إن رغبتك إنك تبقى زيهم هي اللي مدية طعم لحياتك.

استمتع بشمس الصيف.. بصلها و قولها إنك مش كارهها.. حتى لو عرقتك و لزقتك..

روح اقعد على البحر.. دخل رجليك في الرمل.. و خرجها.. بطل تفكير.. و ابدأ حس..

في الشتا انزل تحت البطانية و حط كوباية الشوكولاتة السخنة جمبك.. ابتسم و غمض عينيك و نام.

اشتغل لحد ما تحس إنك مت.. نام تاني و اشحن و روح موت نفسك تاني.. واعرف إنك زودت حاجة للدنيا ماحدش كان هيزودها غيرك.

اعرف إنك كائن مهم و في كل لحظة بتغير اتجاه التاريخ.

بص لشحات واقف جمبك.. ماتديلوش ولا نكلة.. بس سلم عليه و اضحكله و قوله “عامل إيه؟ تمام؟

سلم على واحد صاحبك و خدوا بالحضن.. و زود مدة الحضن ثانية زيادة.. هتقوله حاجات كثير.. – بس اتأكد إن نيته مش وحشة و إنه عارف إنك “مستقيم 

بص لبنت مغرورة و اضحك من جواك.

بص لبنت وحشة و عاكسها بنظراتك و اعرف إنها هترجع البيت مبسوطة.

بدون سبب ابعت رسالة لأي حد بتحبه قوله حاجة حلوة.

افتح شباك العربية و إطلع على طريق سريع خلي الهوا “يطس” في وشك.. صرخ.. بس اتأكد إنك مش داخل على لجنة و إنك لوحدك و مافيش حد تعرفه في العربيات اللي حوليك.

خلى اللي يكره يكره و اللي يشتم يشتم واعرف إنهم مضيعين وقتهم.

اتأكد إنك لو عارف إنك هتموت بكرة هتعمل نفس اللي بتعمله دلوقتي.

كل أكلة حلوة قوي.. بس ماتخليهاش

تشبعك.

اشرب مشروب دخلت المطبخ و اخترعته و لو ماعجبكش ارميه في الحوض و انزل اشرب حاجة تانية بتحبها.

ماتشربش شيشة أو سجاير.. اشرب الهوا.. استمتع بيه.. مش هتعرف قيمته إلا لو خلوا الهوا بفلوس.. ساعتها هتستمع بيه كأنه سيجارة حشيش مغربي!!

بطل خمرة و مخدرات.. و اتعلم إزاي تستمتع بحتى أوحش الحاجات حوليك.

اكسب نفسك و حب حد بيكرهك.

اكسب نفسك ثاني و حب حد بتكرهه.

اكسب نفسك ثاني و انسى حد لسه بتحبه من غير ما تكرهه.

اتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.

انزل شجع مع الزملكاوية لما يكسبوا.. حتى لو أنت مش زملكاوي.

اقرأ الكلام ده من غير ماتعلق عليه و لو مش عاجبك بطل قراية.

شوف فيلم الكيف و ماتتفرجش على آخر ربع ساعة فيه.

اتفرج على الناظر من أول ما بيظهر محمد سعد.

لما تقابل واحد مش فاكر اسمه و مش بتسلم عليه عادة خده بالحضن و قوله واحشني جدا يا معلم..

اقرأ كتاب عن موضوع معقد مانتاش فاهمة و بعدها انزل مع صحابك.. هتتبسط قوي.

جرب أكلة جديدة في مطعم فخم.. ثمنها يخرب بيتك.. و روح و أنت مبسوط.

شد مع عربية سيات.

البس أحلى لبس عندك و انزل امشي في الشارع و أنت فارد ظهرك.. و ماتحطش إيديك في جيبك خليهم أحرار.

اشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن.

ارقص حتى لو في أودتك و أنت قافلها بالمفتاح.. ممكن تغني كمان و أنت ماسك الفرشة على إنها ميكروفون.

افتكر قبل ما تنام كل الكلام الحلو اللي سمعت الناس بتقوله عنك.

كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله.

كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من
غير ماتفكر و ابتسم.. لوحدك هتتبسط فعلا.

شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.

فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب.

سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك.

استحمى في نص ساعة.. خلى المية تنزل على وشك و اسمع صوتها كويس.

جيب لنفسك هدية و استنى لحد عيد ميلادك و اديها لنفسك.

جيب هدية لحد بتحبه من غير مناسبة.. و اديهاله في عدم اهتمام كأنك ماعملتش حاجة غريبة.

انزل من بيتك بشبشب و شورت من غير ماتسرح شعرك.. و اتأكد من جواك إنه عادي جدا.. أنا مش مهتم.. و خليك واثق من نفسك.

أشرب ميه كثير.

ماتغضبش مهما حصل.

أشكر كل الناس بسبب و من غير سبب.

لو حد اتريق عليك اضحك.. حتى لو من جواك بتضحك عليه.

لو حد شتمك حط ده في تانك البنزين بتاعك علشان يبقى طاقة تحركك لقدام.

لو الناس بعدت عنك إعرف لأنكم مش زي بعض.. لا هما وحشين و لا أنت وحش.. أنتم بس مش زي بعض.. و اتبسط إنك مش بتضيع وقتك معاهم.

لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك.

بص لإمبارح.. و شوف أتعلمت منه قد إيه..

خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها..

استمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح..

اسمع أغنية مدحت صالح وانا ويايا بعيش زي المليونيرات و شوفها على اليو تيوب و اضحك منها أو عليها.. بس في الحالتين هتضحك.

لما حد يحكيلك حاجة مملة علشان يبين مواهبه في الحياة إعمل نفسك مهتم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين..

افتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و اتبسط إن ده كله خلص و مش راجع تاني.

انتهى!!

أهم الاخبار