ع الفيس بوك

الصفحه الاخيره

الجمعة, 11 فبراير 2011 09:59
خاص - بوابة الوفد:


كتبت القصيدة قبل الأحداث الجارية في ميدان التحرير بستة أشهر على وجه التحديد بتاريخ 12 رمضان 1431 الموافق 22 أغسطس 2010م وألقيت في أكثر من ندوة شعرية وأدبية وهي حاليا ضمن مجموعة شعرية تحت الطبع للشاعر محمد السيد سليمان - مدينة بيلا محافظة كفر الشيخ

ع الفيس بوك

ف الليله الأولى بعد الألف

شفتك ع الفيس بوك

وأنتي بتلمي ف بقاياكي المتنَّتوره

مِنك فيكي

وعينيكي الملغومة بأسرارها

بتملا جراب الحاوي حكاوي

مشفرَّها سكوتك

الزايد عن حده

بجلالة قدره

الـ .. الـ .. الـ ..

يووووووووه

أهو أي بتاع من بتوعاتك

وخلاص

مقدرش يبارز نظراتك

البرجوازية

على رفرف ذاتك

راكب ومدلدل ..

ومدلدل ..

آه

ومدلدل رجليَّه

ماسك ف إيَّديه

قصيدة شعر كاتبها لك

ببرادة روحي

وأنتي ولا تبوحي

ولا حتى بنظرة

تستر مواجيعي

من واغش عشقك

كام مرة

ناغشتك

بالمحسوس المبهم

والمحسوس الجهري

مستنظر فجري يشقشق

زمزأ ولا شقشقشي

وأنتي اللي واللي واللي

مطلَّعة ما يتيني

ولا مرة للحظة

للحظة

تحسيني

لقياني على باب الجامع

والا آني نبته شياطيني

مش ع الخريطة الشرعية

مدد يا ماما وطنية

فرشت قلبي طبلَّية

لمي العيال بقى نتغدَّى

الشهريار ولَّى وعدَّى

ما فضلش منُه فتفوتة

هيَّه السيَّر بعد الموتة

بترد تاني فيها الروح ؟!

ليه التاريخ دايما مبطوح؟؟!!

والحي أبقى م الميَّت

صدقتي بقى إني مصَّيت

وواد بُرم وابن لزينه

ننين عيوني "باليرينا"

وأنتي اللي ساعة العصرية

تدلعي تملي البلاص

والبحر قال إيه

يضحك لك

ماهو ياما بَّكى عليكي الناس

وح يجي يوم ويجوع ياكلك

ما يسبشي فيكي مصموصة

حلمي انكسر م العصعوصة

سَّقط رُطب ف الفسحاية

ما فضلش منُه ولا نوايه

عُصفر كَلُه

ماسندش الزير

جرَّبتي مره تحسي فقير

ما حلتهوش غير

نبض وشوق

والا إنتي دايما رامية لفوق

بينك وبين الفُقرا حِجاب

لبلبت ليكي من السرداب

لقيت وشوش

عُشاق مهاويس

حوالين مقامك ف الحضرة

يتخفشوا والضي بصيص

مدد يا مولاتي "العدرا"

دستة شموع نِدر أمانة

شبطت ف لحية مولانا

فاح الشياط من سيف "مسرور"

والديك مأيَّر ما بيدنش

مين اللي جيَّ عليه الدور

ف ليل مقلقل قلاقيل دبش؟

والناس على فيض المولى

من غير قوة ولا حولَّ

متباعة رخيص ف مقاولة

ف بلاط الحبسك خانة

وإنتي اللي هواكي رامانا

ف العشق هيام ومَذَّلة

مش كل ما قل ودل

ينفع ف الليل سهراية

وقمر ونَّاس ف حكاية

من بين الألف حكاية

بتهز الرأي العام

وأنا وسط نبالم الألغام

طيَّرت الصبر

حمام

وبنيت لك فيَّا

مقام

بتحج عواطفي إليه

ولا يوم خوَّفني

الـ .. الـ ..

آه

الإيه

ولا جن جنون

ابن الـ .. الـ ..

آه

ولا جن جنون

ابن الإيه

قلبي قاطع أبونيه

من طيبة للمحروسة

شايفك ف الكوشة

عروسة

على سرج حصان

"مار جرجس"

مزفوفة ف ساحة "الأزهر"

والحبشي "بلال" مستنظر

على سطحة دار "الأرقم"

تكسير الأصنام ف "الكعبة"

وكذلك ف ميدان الـ ..

الـ .. الـ ..

يووووووه

ف ميدان "التحرير"

م العبودية الطالة علينا كابوس

الخوف "هكسوس"

و"الأحمس" لسه شنبُه ما نبتش

على جسر شفايفه

الحلم اللي أنا شايفه

قال إيه.. اللهم إجعله خير

شفتك ع الفيس بوك

وإنتي بتلمي ف بقاياكي

المتنتَّوره منك فيكي

وعينيكي الملغومة بأسرارها

بتملا جراب الحاوي حكاوي

مشفرَّها سكوتك

الزايد عن حده!!

أهم الاخبار