رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

حتقدر وفاضل ع الحلم دقة

سلمى صباحى تغنى لثورة الغضب

الصفحه الاخيره

الأربعاء, 26 يناير 2011 18:19
كتبت- ناهد إمام وعلياء ناصف:

للقوة الناعمة دائماً دورها المهم، والرائد فى أحداث الشعوب، وبهذا الصدد قدمت الإعلامية سلمى صباحي أغنية خاصة بيوم الغضب احساساً منها بقيمة هذا اليوم،

وتقديراً لهذه التظاهرة السلمية ، وإيماناً بقدرتهاعلى إحداث تغييرات جذرية .

 

شاركت سلمي في مظاهرات القاهرة مثلها مثل والدها حمدين صباحي مؤسس حزب الكرامة الذي قاد المظاهرات بكفر الشيخ، قالت سلمى للبوابة الإلكترونية للـ" وفد" : "أبويا وأمي مربيني على عشق البلد دي، اللى حصل في بلدنا كفاية يتسكت عليه، بالنسبة للمظاهرات أنا متعودة عليها من أيام الجامعة، لكن حقيقي إيماني بالشعب اتأكد امبارح، وفرحتي كانت متتوصفش علشان أغلب الناس اللى نزلت ملهاش أى اتجاهات سياسية، مصريين حاسين بالبلد فنزلوا

الشارع، امبارح في ميدان التحرير كنت حاسة اننا أخيرا اتجمعنا في حاجة صح، وربنا ينصر شبابنا العظيم".

وعن الأغنية الخاصة بهذا اليوم أضافت :" وبالنسبة للغنوة أنا عموما مبحبش أغني للمناسبات، لكن اللي متابعني من زمان هيلاحظ إني بحب أغني لمصر ولشعبها العظيم، وأنا مؤمنة جدا بقدرة الفن على التغيير، المهم تكون حاسس بالكلام اللي بتقوله وبتنزل الغنوة مش استغلال للظروف، علشان الشهرة، والكلام اللي قلته في الأغنية إن شاء الله هيتحقق في مصر، وكل الأمة العربية اللى اتجمعت في هم وحلم واحد وهو الحرية".

أغنية الصباحى كلمات أحمد شلبى، ألحان وتوزيع شريف اسماعيل، استوحت جزءاً منها من قصيدة للشاعر أحمد فؤاد نجم، وبدأتها بأبيات أبى القاسم الشابي

إذا الشعب يوما أراد الحياة

فلابد أن يستجيب القدر

ولابد لليل أن ينجلى

ولابد للقيد أن ينكسر

ده مين اللى قال بس مش قادرين

نحدد طريقنا ونمشيه منين

ح نقدر وبكره ح تحكى السنين

تقول احنا كنا فى لحظة هنا

ح نقدر إذا بس يوم نتفق

نقول كلمة واحدة ولا نفترق

ساعتها طريقنا راح يتخلق

قصادنا ونمشي فيه كلنا

فى جزمة سيادته كلابه يبوسوا

وفوق الغلابة جزمهم يدوسوا

وشعبك ليلاتى يا مصر غموسه

مذلة وحرقة وحبة مر

كفاية مهانة يا مصري وثور

وارفض تطاطى وتقول أى زور

وكسر قيودك وعدى الجسور

واعرف بأنك اتولدت حر

بصوتنا هننده لبكره بشوق

ونحلم ونعلى بأحلامنا فوق

ولحظة ما نوصل حنقدر ندوق

حرية وحشانا من زمان

وإياك تقول مش ح تقدر لأه

ح تقدر وفاضل ع الحلم دقة

وحدتنا تديى لقوتنا زقة

ونقدر

ماهو احنا قدرنا زمان

 

استمع أغنية " الشعب " لسلمى


 

 

 

أهم الاخبار