رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

كارم.. حلم حياته بعد الثورة تصريح بكشك من غير "رشوة"

الصفحه الاخيرة

الثلاثاء, 03 أبريل 2012 20:18
كارم.. حلم حياته بعد الثورة تصريح بكشك من غير رشوةكارم
كتبت: فكرية أحمد

كان يقف بجانب بضعة اقفاص متهالكة تحمل تشكيلة مختلطة من الخضراوات، يتلفت بين لحظة واخري حوله في توجس، وكأنه ينتظر حدثاً ما، راقبت قلقه وتوتره للحظات، ووجدتها فرصة للسؤال وادارة الحوار:

كارم محمود 33 سنة أنا اصلا من الغنايم وساكن في أبو النمرس في الجيزة من ساعة ما اتولدت.
............
- زي مانتي شايفة، بابيع شوية الخضار دول، باجيبهم علي راسي في ميكروباص، من الجيزة للحتة دي البعيدة، عشان مافيهاش بقالة ولا سوبر ولا بياعين خضار، يعني الرزق هنا حلو، بس الخوف وحش.
............
- أيوة خايف وقلقان عشان كدة كل شوية ابص حواليا، كل شوية يطلعولي بتوع البلدية، يشيلوا شوية الخضار ولا يخلوني امشي من هنا، ويضيع عليا رزق اليوم، والله دانا في رقبتي ثلاث بنات اكبرهم لسة في سنة ساتة، وبراعي امي وست اخوات، يعني اعمل ايه بقي انهب ولا اسرق، انا عايز لقمة بالحلال.
............
- والله انا نفسي اطلع رخصة

بكشك ابيع فيه شوية الخضار دول، بس نفسي اطلع الرخصة من غير رشوة، أول هام الرشوة حرام وملعونة، تاني هام انا اصلا ماعنديش فلوس حتي اديها رشوة، قالولنا بعد الثورة هيحاربوا الفساد والرشوة، ولا اتحاربت ولا حاجة، اهي زادت في كل مكان، والنبي انت كدة ماعندكيش واسطة، ولا بلاش لحسن تتأذي وانت صحفية كدة ويتهموكي بقي بالمحسوبية والواسطة، اصلهم ليهم ناس ناس، ناس واكلاها والعة وناس مش لاقية اللضي علشان ماشية بالحلال.
............
- بصي انا حاولت اخد رخصة لكشك في الهرم، لكن مش عاوز اقولك دخلت في متاهات ياما لما زهقت، ولقيتهم بيدوا للي هم عاوزينه بس، وانا ماليش ضهر ولا واسطة، يعني افضل ماشي كدة شايل القفصين علي راسي ورحال من هنا لهناك، ده يرضي ربنا.
............
- والله انا ماعرفش شغلانة غير بيع الخضار، واحد زي حالاتي هيشتغل ايه يعني والبلد كلها مقفلة في حكاية الشغل دي.
............
- شوفي الثورة حلوة والجيش ابن حلال وحمانا، بسبب اللي بيحصل دولقتي مش حلو، تحسي ان فيه لعب كدة مش فاهمينه، والواحد عاوز فهامة تقعد جنبه تشرحله، مين دول ومين دول، ومين مع مين ومين ضد مين، اهو كلهم بيتخانقو علي كراسي السلطة والغلابة اللي زينا رايحين في الرجلين.
............
- واجهنا البلطجية وواجهنا الموت ايام الثورة، وكان عندنا امل ان الدنيا تتغير للاحسن، لكن يظهر ان فيه ناس مش حابة الثورة دي، ومش عايزين الشعب يرفع راسه ويتنفس، دول قتلونا وخنقوا نفسنا، مابقيناش لاقيين رغيف العيش، يعني الواحد يسيب بلده وولاده ويهج برة، طيب فين نهج، دي حتي ليبيا ولعت ولسة ماطفيتش، وادي العراق خربانة، ودول الخليج التانية بتطرد اللي زينا ومالهمش مكان، يعني نعمل ايه دلوقتي.
............
- عنواني صعب الوصول ليه، لكن تليفوني لو حد يقدر يساعدني اني اطلع رخصة لكشك من مجلس مدينة المعادي يتصل بينا ويساعدني وله الاجر والثواب عند الله، انا غلبان وعلي باب الله وماعنديش حاجة اديها لحد الا الدعا بالستر تليفوني هو 0161655973.

أهم الاخبار