شباك عــلي الثورة
الشاعر العظيم الراحل - الباقي صلاح عبدالصبور عليه السلام له قصيدة عظيمة بعنوان مذكرات الصوفي بشرالحافي، يقولها صلاح بديباجة تقول هو أبو محمد بشر بن مش عارف إيه وسمع سماعاً كثيرا ونزل يوما إلي السوق فأفزعه الناس فخلع نعليه ووضعهما تحت إبطيه وانطلق يجري في الرمضاء فلم يدركه أحد وأنا تقريبا شفت الشويه دول بعد الثورة أو أثناء الثورة بعد ثوار التليفزيون المصري
ما انتفضوا داخل المبني وبدأوا يشيرون باصابعهم الي الفاسدين المجرمين عصابة حسني السيد إبراهيم مبارك الذي وصل ما تعرفش ازاي وهو يوم ما اترزع في الكرسي ما بطلش سرقة ولا ظلم علي مدي ثلاثين عاما افرنجياً بالتمام والكمال. ربنا ينتقم منهم جميعا بعدله وياخد بتار وحق المظلومين فيكي يا مصر يا محروسة ياللي رب العباد حبك وحطك علي شط النيل تشربي وتسقي الدنيا حواليكي يطرح علي كفوفك الربيع من كافة شيء خلقه ربنا سبحانه وتعالي ونرجع بقي لسيدنا بشرالحافي تبع صلاح عبدالصبور رحمة الله عليه وبركاته، وإذ بالتليفزيون يرسل من ماسبيرو أمام مبني التليفزيون بأضرب كده بعيني ألاقي شخص افندي طالع من الباب ما يجري بسرعة رهيبة وبعدين يهدي شوية ويبص وراه ويرجع تاني يجري رجليه تعلمش ع الأرض حتي اختفي ولم يدركه أحد اتاري دامين بقي يا سيدي.. بسلامته عبداللطيف المناوي المخبر المتميز في عصابة مخبري صفوت الشريف الشريف جداً وهذا انا اتعرفت عليه قبل ما اشوفه وانا لسه لغاية وقتنا هذا ما شفتوش والحمد لله واثناء ما كان بيجري في الشارع كانت
- تمام يا فندم العملية تمت بنجاح ميه المية وهذا بفضل توجهات سيادتك وانا بتاعك علي طول يا باشا
قال:
- روح وانت رئيس قطاع الاخبار ياتيفه .. المدهش في الامر ان المدعو المناوي ينعم الآن في لندن عاصمة المملكة المتحدة المعروفة قديماً بـ «بريطانيا العظمي» يعني بيشوفوا بعض هناك هو والحرامي الرزل بطرس غالي ومعهم شيخ المنسر المدعو حسين سالم صديق المدعو حسني السيد إبراهيم مبارك «حرامي الجاز» لكن عموماً كل ما يتلموا علي بعض كل ده ما يبقي احسن ليه بقي سيادتك لأن عشماوي مش حيتعب في لمهم لحظة التنفيذ.
تعيش الزهور
إذا الدنيا نور
وتملا الخمايل
وتطرح مودة
عدد كل وردة
وتعمل عمايل
باحبك يا بلدي
واحبك ربيع
شبابك مصحصح
وجوك بديع
أحمد فؤاد نجم