رئيس حزب الوفد
د.عبد السند يمامة
رئيس مجلس الإدارة
د.أيمن محسب
رئيس التحرير
د. وجدى زين الدين
رئيس حزب الوفد
د.عبد السند يمامة
رئيس مجلس الإدارة
د.أيمن محسب
رئيس التحرير
د. وجدى زين الدين

شبـــاك علي الثورة

بعد السحور.. رن جرس التليفون الأرضي فرفعت السماعة

- الو

- أيوة يا عم نجم

- مين؟

- أنا واحد مصري

- أهلا يا واحد مصري

- أنت طبعاً ماتعرفنيش

- أنا تحت أمرك

- إنت مش بتقول إنك من أشد المعجبين بالنائب العام؟

- نعم حصل

- ولسة معجب لوقتنا هذا؟

- ويارب يستمر هذا الاعجاب مع دعائي له بطول البقاء والتوفيق

- طيب أنا باكلمك دلوقتي بخصوص هذا الموضوع

- وأنا كلي آذان صاغية

- إنت فاكر ياعم نجم حكاية الونش اللي اختفي؟

- ياااه دا من زمان قوي!

- يعني فاكر أهه

- أيوة ياسيدي فكر مانسيتش

- تصدق بقي انك راجل جميل

- ربنا يكرمك .. بس إيه اللي خلاك تشوفني راجل جميل

- إنت لسة فاكر مع إن الناس كلها نسيت موضوع الونش

- ماهم دايما بيراهنوا علي ان الناس بتنسي

- ضحك.. شفت ازاي؟

- شفت يا سيدي وياما لسة ح اشوف وانت كمان تشوف

- لأ.. خلاص ما عادش حد حينسي كتابة ثلاثين سنة يا عم احمد كفاية

- يارب نكون صحينا بقي ببركة دم الشهداء ودعاء الوالدين

- نرجع بقي لموضوع الونش وصاحبك حبك النائب العام

- نرجع

- الونش دن أصلا ما وصلش مصر

- مش فاهم!

- الونش ده يا عم أحمد كان جاي ضمن معدات الشركة اللي رسي عليها عطا مترو الانفاق في مصر المحروسة

- وبعدين اتباع واتقبض ثمنه في ميناء مرسيليا

- مين اللي باعه ومين اللي قبض تمنه؟

- السيد علاء مبارك

- إنت بتقول إيه؟!

- باقول اللي سمعته

- بس دا يبقي جنون

- يبقي زي ما يبقي

مش دي القضية يا عم أحمد

- أمال فين القضية

- القضية هنا في القاهرة

- مش فاهم

- مين ياعم احمد اللي استلم الونش هنا في القاهرة ومين اللي وقع بالاستلام؟

- فعلاً

- فهمني بقي ياعم أحمد.. هنا أول الخيط لو مسكته حالا حنوصل نهاية الخيط.. الونش ياعم احمد اتباع في مرسيليا وقبض ثمنه علاء مبارك وبعد كام يوم بدأوا يشيعوا إن الونش اتسرق من هنا لغاية ما الناس نسيت

- بس دا شغل شياطين

- وهي برضه الشياطين ممكن تعمل كدة؟

- لا والله دا احنا كدة نبقي بنظلم الشياطين

- دا لسة ياما في الجراب يا حاوي

- لسة إيه تاني ياعم

- لسة موضوع النكاريا المصرية في السعودية اللي باعها جمال مبارك وقبض ثمنها وضربه في جيبه

- طب ممكن بالراحة علي شوية لحد ما استوعب

- استوعب علي أقل من مهلك احنا ورانا إيه

- طب أنت لسة عندك حاجة تاني

- عندي حاجات بس انت قول لصاحبك النائب العام شد حيلك واستعد للي جاي.