شباك علـــي الثورة

احمد فؤاد نجم

الأحد, 14 أغسطس 2011 09:39
بقلم :أحمد فؤاد نجم

قال عبده شمة

ـ سمعت ياعم أحمد الخبر؟

قلت:

ـ اللهم اجعله خير

قال:

ـ الواد مليم ابن الحاجة كايداهم جبصوه أولة امبارح فضحك أحمد القزعة قائلاً:

ـ يا ابني انت حتنطق عربي امتي؟

فقال شمة:

ـ مالك يازفت الطين انت

فقال القزعة:

ـ جابصوه أولة امبارح دي عربي ياعم أحمد؟

 

قلت ضاحكا:

ـ عربي عكس

فقال عبده شمة:

ـ عما يجولك جاسوس سعودي كان ولا أبصر ايه

قلت:

ـ أنا فعلا عندي معلومات إن المخابرات

السعودية مجندة مجموعة من الشباب المصريين.

فقال عبده شمة:

ـ اثنين مليون ياعم أحمد

قلت:

ـ يخيل لي  ان الرقم مبالغ فيه حبتين

قال أحمد القزعة:

ـ رقم ايه ياعم أحمد وهي المخابرات السعودية دي مش عربية إسلامية؟

قلت:

ـ بيتهيأ لي:

فقال القزعة

ـ طب ازاي عرب ومسلمين يتجسسوا علي بعض؟

فقال عبده شمة:

ـ وانت ايش أفهمك في المسائل دي

ياجهول؟

فقال أحمد القزعة:

ـ منك نستفيد ياغيبوبة

قلت:

ـ الأنظمة العربية شيء والشعوب شيء تاني يا قزعة.

قال القزعة:

ـ برضه مش فاهم

فقال عبده شمة

ـ ولا عمرك حتفهم ياجزعة

قلت:

ـ انت فاكر يا قزعة حصار قطاع غزة وضربه بقنابل الفوسفور الأبيض.

قال القزعة:

ـ ودي حاجة تتنسي.

قلت:

ـ أهو دا حصل بالتواطؤ مع نظام العميل حسني مبارك مش كده.

فقال القزعة:

ـ كده تمام.

قلت:

ـ هل الشعب المصري كله كان موافق علي كده.

قال لي:

ـ لا كله ولا نصه ولا حد خالص  كان موافق.

أيوه أيوه فهمت الشعوب شئ والحكام شيء تاني صحيح.