شبــاك على الثورة

احمد فؤاد نجم

الأربعاء, 10 أغسطس 2011 10:31
بقلم - أحمد فؤاد نجم

- تصدج ياعم أحمد إني ماكنتش مصدجك لما جلت لنا زمان إن البعث السوري أشد وأنكي من البعث العراقي!

هكذا قال عبده شمه فقال أحمد القزعة

- عرفت بقي إنك مخشمون ومن زمان؟ يعني مخشمون قديم

 

فقال عبده شمه

- بس يا بتاع إنت خلينا نعرف نتحدت

فقال أحمد القزعة

- إنت لسة عايز تتحدث تاني؟ ما انت طول عمرك هارس دماغنا بالرغي عمال علي بطال.. جتها نيلة اللي عايزة خلف

قلت لعبده شمه

- لكن إيه بالتحديد اللي خلاك تصدق كلامي دلوقتي؟

قال

- الوحشية التي يتعامل بها النظام السوري مع المظاهرات السلمية في كل المدن السورية

وضحك أحمد القزعة قائلا

- وإيه الجديد يا غيبوبة في الموضوع

فقال عبده شمه

- كيف يعني؟

فضحك القزعة قائلاً

- إنت عمرك شفت حاكم عربي بيتعامل مع شعبه بحنية؟

وقال عبده شمه

- وهو بشار الأسد معدودحاكم عربي

وضحك أحمد القزعة قائلاً

- لأ معدود حاكم إفرنجي

وصاح عبده شمه

- دا طبيب يابجرة يعني حكيم وحكيم عيون كمان

وضحك أحمد القزعة وهو يغني

حكيم عيون أفهم في  العين

وأفهم كمان في رموش العين

أعرف هو أهم ساكن فين

وأعرف دواهم ييجي منين

إنت ما سمعتش عبد الوهاب وهو بيغني الغنوة دي؟

فقال عبده شمه

- إلا صحيح ياعم أحمد المدعوج ده جاب الوحشية دي منين

قلت

- يا حاج عبده مابني علي باطل هو باطل، وكلنا عارفين إن بشار الأسد ورث ملك سوريا عن أبيه حافظ الأسد

وهو المعروف بسفاح حماه التي دكها الطبرق السوري حتي سواها بالأرض وبعدها استتب علي كرسي السلطة في سوريا واطلقوا عليه مجموعة من الألقاب البطولية باعتباره محرر سوريا وأمين القومية العربية وقائد الممانعة وأشياء ما أنزل الله بها من سلطان ولما فطس صمموا علي توريث أحد أبنائه السلطة وكان الفتي بشار هو أكبر أبناء حافظ الأسد ولكنه لم يكن قد بلغ السن القانونية لرئيس الجمهورية فاجتمع مجلس الأنس الذي يوازي عندنا ما يسمي بمجلس الشعب المصري وقرر خفض السن القانونية لرئيس الجمهورية حتي يليق بالفتي بشار طبيب العيون وضحك أحمد القزعة قائلاً:

- طب قولي لي بقي يا غيبوبة عمرك شفت كدة

وضحك عبده شمه قائلاً

-  لا والله يا جزعة لكن علي رأي المثل اللي يعيش ياما يشوف واللي يمشي يشوف أكتر

فضحك القزعة قائلاً

- عفارم علي عشرة زيك يا أبو خاله يا غيبوبة