شباك علي الثورة

الحقوها.. الحقوها.. السوايسة ولعوها

سألتني نوارة الانتصار في التليفون

- شفت السويس يا بابا؟

ضحكت وقلت لها

- شفتيها إنتي

نفخت في غيظ وقالت

- هو أنا يابابا كل ما أسألك سؤال تجاوبني عليه بسؤال برضه؟ أنا بقولك شفت السويس يا بابا تقول لي شفتيها إنتي يعني إيه ده؟

ضحكت وقلت لها

- يعني إن السويس كانت طليعة ثورة 25 يناير المجيدة ده مش خبر

قالت بمنتهي الدهشة

- ده مش خبر؟ أمال إيه بقي هو الخبر في نظر حضرتك

قلت لها

- يا نوراة يا بنتي السويس طول عمرها بتعمل كدة

قالت بصوت تملؤه الفرحة

- إخص عليك يا بابا.. طب أنت ليه ما حكيتليش عن السويس

قلت لها

- أنا آسف يا نونو.. أنا فعلا حمار

ضحكت وقال لي

- بلاش التواضع ده أنت اكبر من كدة بكتير يا أبو النجوم

قلت لها

- طب انتي عارفة إن السويس قدمت لثورة 25 يناير أول شهيد اللي هو مصطفي الورداني رضوان الله عليه؟

قالت بصوت باك

- رضوان الله عليهم أجمعين.. أنا يا بابا مكسوفة من نفسي

قلت لها

- أنا فهمتك وعارف سبب كسوفك

قالت لي

- طب هو إيه؟

قلت لها

- إن أمنيتك ما اتحققتش من كدة برضه

قالت لي

-  بالظبط يا بابا

قلت لها

- طب انتي عارفة إن الشهيد مصطفي الورداني كان من اصحاب هذه الامنية

قالت

- طب أنت عرفت منين؟

قلت لها

-  من أبوه العظيم اللي استضافه يسري فودة في برنامج «آخر كلام» الذي يذاع علي قناة أون تي في الرائعة

قال أبو الشهيد

-  أنا مش زعلان علي ابني استشهد لأن دي كانت أغلي امانيه كان عايز يستشهد في قطاع غزة أثناء تنفيذ مؤامرة ما سمي بالبحث عن الجندي الصهيوني الاسير عند حماس «جلعاد شاليط»

-  مصطفي ابني نال مراده وربنا حقق له أمنيته ولكن علي  أرض مصر وفي مدينة الأبطال والشهداء «السويس» التي شهدت مولد ورحيل الشهيد مصطفي الورداني شفتي بقي السويس

قالت

- والنبي يا بابا تحكيلي عن السويس علي قد ما تقدر