رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شباك علي الثورة

احمد فؤاد نجم

الأربعاء, 15 يونيو 2011 09:43
بقلم-احمد فؤاد نجم

عندي معلومات اكيدة مؤكدة عن أغرب وأعجب عملية بيزنس ممنهجة كان يمارسها المخلوع حسني مبارك يومياً بأعصاب باردة وبفجاجة بلغت حد الوقاحة والبلطجة فقد كان دخل قناة السويس كله بالعملات الصعبة يذهب إلي جيب هذا اللص تحت مسمي »مؤسسة الرئاسة!« وقد تساءل الشيخ عبده ذات مرة

- إلا جول لي يا عم أحمد

قلت له

- تحت امرك يا حاج عبده

قال

- هي مؤسسة الرئاسة دي بتنتج إيه؟

فضحك احمد القزعة قائلاً

- بتنتج حرامية ترانزستور يا غيبوبة تحب أحجز لك واحد؟

فقال الشيخ عبده

- بس يا بتاع انت خلينا نفهم

فقال القزعة

- ما هو دا عيبك يابو خاله.. عايز تفهم ليه؟ وتفهم

إيه؟

فقال الشيخ عبده

- عايز افهم الدنيا رايحة فين وجاية منين يا جاموسة

فقال القزعة

- وافرض انك الله لا يقدر فهمت حتعمل إيه؟

فتوجه الشيخ عبده بحديثه نحوي

- كيف ياعم احمد يحصل الكلام ده وماحدش ياخد خبر بيه امال فين القائمين علي شئون قناة السويس؟

قلت له

- القائمين علي شئون قناة السويس في مكاتبهم الفخمة المكيفة وسياراتهم الفخمة تنتظرهم في الذهاب والاياب

فقال الشيخ عبده

- ويا تري ما كانش عنديهم خبر بالموضوع ده؟

ضحك احمد القزعة قائلا

- يخيب خبيتك اللي ما يقول يا عزيز خبر إيه

وموضوع إيه اذا كانوا هم اللي بيستفوا المصاري ويبعتوها علي شيخ المنسر كل ليلة

فقال الشيخ عبده

- حسبنا الله ونعم الوكيل هي الناس دي ياعم احمد ما بتخافش ربنا؟

فسألته

- وهل كان حسني مبارك يخاف ربنا يا شيخ عبده؟

فقال

- أيوة صحيح طيب ودم الاف الشهداء اللي ماتوا في حفر قناة السويس مين يحاسب عليه؟

قلت

- يحاسب عليه الذي لا يغفل ولا ينام يحاسب عليه المنتقم الجبار

وتساءل احمد القزعة

- علي كدة بقي الفلوس دي حترجع لنا احنا، ابسط يا غيبوبة الميه حتجري في اديك وماحدش حيعرف يكلمك بقي

وضحك الشيخ عبده قائلا

- وحيجبضونا ياتري بالمصري ولا بالعملة الصعبة؟

وضحك احمد القزعة قائلاً

- الحق دا الغيبوبة صدق هو اللي بيروح عند الحكومة بيرجع تاني، لكن يمكن يعملوا بيها مصالح في البلد

فقلنا في نفس واحد

- يسمع منك ربنا يا قزعة