شباك علي الثورة
قال ميشو متسائلا:
- مش كان لسه بدري علي حكاية فتح معبر رفح؟
فأجابه الدكتور أشرف:
- بدري من عمرك
وأضاف أحمد القزعة:
- الحق يا غيبوبة: بيقول لك »كان لسه بدري«
فضحك الحاج عبده
- كان بدري عليك عليك بدري
فقال ميشو مدافعا عن وجهة نظره:
- انا ما باهزرش أنا باتكلم جد. دلوقتي قدر إن إسرائيل فقدت أعصابها
- فأجاب أحمد القزعة:
- يسمع من بقك ربنا
فقال ميشو:
- هي إسرائيل مش ممكن تحتل سينا؟
قال الدكتور أشرف:
- ممكن كل شيء وأي شيء ممكن في الوقت الراهن
فتساءل ميشو بلهجة انتصار:
- طب وبعدين
قال له أشرف:
- ولا قبلين
فقال ميشو:
- مين في هذه الحالة حيحرر سيناء
قال له الدكتور أشرف:
- انت بتسأل السؤال ده علي اساس ان الشعب المصري انقرض أو اضمحل
فقال الحاج عبده:
- طب وبعدين يا دكتور: هو الشعب المصري مكتوب عليه يتفرغ لتحرير سينا كلما احتلها كل من هب ودب؟
قلت له:
- وماله يا حاج عبده امال حنأجر ناس يحرروا
فقال أحمد القزعة:
- تصدق يا عم أحمد ان الخبؤ ده أول مرة يتكلم كلام مفهوم ومعقول
قلت له:
- مفهوم وعرفنا إنما إيه المعقول في كلام الشيخ عبده؟
قال لي:
- يعني لو حنقضيها تحرير سينا امال امتي حنبني
قلت له:
- طب ما هي سينا تحررت في أكتوبر المجيد 1973 ما حدش حط طوبة في البنا ليه؟
- فقال الشيخ عبده:
- أيوه صحيح
فقال أحمد القزعة:
- هو إيه اللي صحيح يا غيبوبة؟ انت معاهم معاهم عليهم عليهم
فقال عبدالهادي:
- بس ياد يا حمار انت
ضحك أحمد القزعة وقال
- تصدق يا عم أحمد ان المخشمون ده ممكن يبقي رئيس مصر!