شباك علي الثورة

احمد فؤاد نجم

الثلاثاء, 17 مايو 2011 09:15
بقلم: أحمد فؤاد نجم

 

قال أحمد القزعة موجهاً حديثه للحاج عبده شمة:

ـ تعرف ياغيبوبة مين اللي قال السؤال ده وقاله لمين؟

فأجاب شمة دون ان ينظر للقزعة

ـ سؤال إيه ياواكل ناسك؟

فقال القزعة:

ـ السؤال اللي بيقول »ايش لم  الشامي ع المغربي«

فضحك شمة قائلاً:

ـ تلجاه شخص تافه زيك إنما ليه يعني بتسأل؟

فقال أحمد القزعة ضاحكاً.

ـ لأن اللي بيحصل في منظومة دول النفط بعد الثورة المصرية مالوش تفسير إلا بالسؤال ده.

فتساءل الحاج عبده؟

ـ هو إيه اللي بيحصل في دول النفط العربي؟

فقال القزعة موجها حديثه لي:

ـ بذمة النبي ياعم أحمد انت طايق الجدع ده ليه؟

فقال شمة:

ـ كلمني أنا هنا ماليكش دعوة بعمك أحمد.

ـ فقال القزعة:

ـ أكلمك انت ليه؟ هو انت داريان بنفسك؟

قلت للقزعة:

ـ بالراحة يا قزعة بالراحة ع الحاج عبده وعلينا اعمل معروف ضحك القزعة قائلاً:

ـ طيب ياعم أحمد عشان خاطرك انت بالراحة لكن غيبوبة ده تنفع معاه الراحة.

قلت له:

ـ جرب يمكن تنفع.

فقال القزعة لشمة:

ـ صلي علي اللي.. مش حتشوفه بإذن واحد أحد.

فضحك شمة قائلاً:

ـ عليه أفضل صلاة وأزكي سلام.

فتساءل القزعة:

ـ هي المغرب من دول الخليج؟

فقال الحاج عبده:

ـ لأ طبعاً.

فقال القزعة:

ـ قربت تفهم ـ تقدر بقي تقول لي إيه اللي خلي المغرب تنضم لمنظومة دول

النفط العربي؟

فقال شمة مستدركا:

ـ أيوه صحيح »إيش لم الشامي ع المغربي«؟ تصدج ياعم أحمد ان الواد ده أوجات بيجول كلام مفيد.

فضحك أحمد القزعة قائلاً:

ـ شفت ازاي يامخشمون اديك قربت تفهم البهوات مفاصلهم سابت جو الدشاديش بعد نجاح الثورة المصرية في أعقاب الثورة التونسية وقال لك دول جايين من أول الصف الحق يا أخا العرب قبل ما ييجي الدور عليك وفي ظرف ساعتين كانوا عاملين درع الجزيرة فتساءل عبده شمة:

ـ وهو درع الجزيرة ده غير برج الجزيرة ياقزعة؟

ضحك القزعة قائلاً:

ـ دا يبقي ابن عم برج الجزيرة زي ماقلك المغرب ابن عم الشيخ فسيان ابن ظرطان تماما ومن هذا المنطلق انضم عرش المغرب لباقي العروش العربية المتصدعة وده بصراحة اختصر لنا الوقت لأنهم بإذن واحد أحد حيسقطوا في نفس اللحظة.