شباك علي الثورة

 

أسوان.. الناس هنا لا شغل لهم ولا حديث الا ثورة 25 يناير المدهشة.. ودائما يبدأ الحديث بـ أين حسني مبارك وعائلته ولماذا لم يقدموا للمحاكمة حتي الآن؟ وأين اعوان اللص ومساعدوه صفوت الشريف وزكريا عزمي وفتحي سرور والناس هنا واثقون من شرف المشير وضباطه وجنوده من أبناء قواتنا المسلحة »مدرسة الوطنية« ولكن الوقت قد امتد وطال كما يقول حجاج النوبي.

طيب ما تفرض إنه مات

ورد عليه زميله محمد

ودا إيه اللي حيموته دا ما بيحسش يا زول

وقال مصطفي

المهم فلوسنا ترجع ويغور في ستين داهية هو وعياله

وضحك حجاج وهو يقول

ولا تنسي الهانم

وقال مصطفي

إلا الهانم دي مرة جهنمية يجولك كانت بتضرب الوزرا بالشلوت

وقال محمد

اهو ربك اداهم الشلوت اللي هو

فقال ماهر

سبحان الله العظيم بجي شرم الشيخ كانت من عجايب الدنيا وكانت زي جنة رضوان تتحول دلوك لزنزانة، سبحانك يا ربي! صحيح يا ولاد »خاب من افتري«

قلت لهم

بكرة جمعة القصاص يا مصريين وربنا سبحانه

وتعالي يقول في محكم آيات كتابه العزيز »ولكم في القصاص حياة يا أولي الألباب« فيا سيادتنا الثوار ارجوكم تخلصوا بقي عشان نتفرغ للعمل عايزين نبني مصر علي عجب عينينا عايزينها عروسة بنت عرب كل ما تخطر علي الارض تخضر الارض وتطرح السنابل وتفتح الزهور والزنابق وترقص العيدان علي نغم الاغاني والمواويل، يالا يا ولاد مصر الحلوة ياللا يا اجمل شباب الدنيا ياللا ترجموا كلام صلاح جاهين:

مطرح ما نمشي بفتح النوار

ننهض في كل صباح

بحلم جديد

ثوار نعيدك يا انتصار ونزيد

وطول ما ايد شعب العرب في الأيد

الثورة قايمة والكفاح دوار

الله يرحمك يا عم صلاح

أحمد فؤاد نجم