إلي ثورة 25 يناير

محلا القصايد في الشدايد والغنا
محلا كلام الحب
أوقات الشقا
إحنا اللي تهنا ع الطريق
من بعضنا
متفرقين

والحلم هو الملتقي
آه يا رفاقه من متاهات الطريق
لما الليالي بينسرق منها السنا
يمشي الصديق في الضلمة
يخبط في الصديق
والسكة بنت الخطوتين
تاخد سنة

إحنا النهاردة فين وكام؟
وبكره كام وبعده فين؟
وبتنا إيه صبحنا إيه؟
وكنا فين بقينا فين؟
في كل يوم بنزور مكان
وكل يوم بنزيد عدد
وكل يوم نفتح بيبان
وكل يوم بنزيل سدد
وكل يوم يطلع بنا
وكل يوم ينزل هدد
وكل يوم نحبل غنا
وكل يوم نولد مدد
آه يا رفاقه
ياللي علمتوا الصلابة للحجر
بانده لكم
وسط الكآبة
والرتابة والضجر
يا مقربين الفجر
نوره ومطلعه
مدوا المسامع في المجامع
واسمعوا
صرخة مغني الحي
من جوف العدم
اتجمعوا
اتجمعوا
اتجمعوا

اتشرف بإهداء هذه الغنوة البسيطة إلي السادة ثوار 25 يناير فإذا أعجبتهم ولحنوها وغنوها فسأكون أسعد الناس لأنهم جبروا بخاطري.