الي "العسكري"!
البتاعة دي مهداة إلي المجلس العسكري والحدق يفهم
ياللي فتحت البتاع
فتحك علي مقفول
لأن أصل البتاع
واصل علي موصول
فأي شيء في البتاع
الناس تشوف علي طول
والناس تموت في البتاع
فيبقي مين مسئول
***
وإزاي حتفتح بتاع
في سط ناس بتقول
بأن هذا البتاع
جاب الخراب بالطول
لأن جثة بتاع
جاهل غبي مخبول
أمر بفتح البتاع
لأنه كان مسطول
***
وبعد فتح البتاع
جابوا الهوا المنقول
نكش عشو من البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر حزين مهزول
***
* ساد قانون البتاع
ولا علة ولا معلول
فالقاضي تبع البتاع
فالحق ع المقتول
***
يبقي البتاع في البتاع
والناس صايبها ذهول
وان حد قال والبتاع
يقولوله مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
***
آدي اللي جابه البتاع
جاب الخراب مشمول
لأنه حتة بتاع
باع البتاع بالبتاع
وعشان يعيش علي طول
عين حرس بالبتاع
وبرضه مات مقتول
***
هذا وقد سألني واحد غتت
ـ طب آدي أنت عامل لي فيها مفتح وتفهمها، وهي طايرة تقدر تقول لي الطيارتين الإسرائيلي اللي دخلوا المجال الجوي المصري وحطوا في المطار المصري شحنوا إيه
قلت له:
- شحنوا عزال السفارة الإسرائيلية
قاللي:
يحموك في كنكة
وبس خلاص