رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شباك علي الثورة

عصفور مهاجر على الطريق

احمد فؤاد نجم

السبت, 03 مارس 2012 12:52
بقلم: أحمد فؤاد نجم

ليل.. يا ليل

والدنيا ليل ياليل

يصعب علي الماشي الطريق بالليل

 

القرب ميل

والبعد ميل

والحيرة واخدة الخطاوي

للضياع في الليل

والغربة ويل ياليل

تفتح علي العاشق ظنون الليل

العشق ويل

والكره ويل

يا حيرة الطير المسافر في سواد الليل

***

قلبين علي قلبي

عصفور مهاجر علي الطريق بالليل

ومشيت وانا جنبي

 زقزق كناري في براري الليل

يانخلة ياللي وحيدة

ضلك علي صحرا

الشمس فوقك بليدة؟

ولا انتي ليه صفرا!

مال الجريد في العلالي

ميل علي الكرناف

والجذع مايل وشايل

حملين علي الأكتاف

يانخلة أمرك دهشني

حالك بخلف  خلاف

حطيتي جنبك وضلك

صحرا وفيافي جفاف

وانا اللي تايه سبيلي

يانخلة ياختي قوليلي

ضيعت ليل ورا ليل

انده علي رفاق الطريق

والليل

الغربة ويل

والسكة ويل

ياعزوة الطير المسافر

ياسهاري الليل

قيدولي شمعة ليل

نسرح علي طول الطريق والليل

لو ألف  ميل

ماتميلش ميل

ياضيعة الصوت المسافر

في سكون الليل

عطشان أنا عطشان

للميه والأغصان

مع إن عشي عودين

وحسوتي فنجان

عطشان جناين جديدة

يانخلة ياللي وحيدة

فيها البحور البكاري

ملو البلاد السعيدة

والشمس تاج الجبال

والميه حضن الرمال

والنسمة روح الحياة

تشبه بحور الزلال

هدارة بتلم الفضا من أوله

وتعطره وتقطره وتسلسله

مطر وديع

ساحر بديع

ينفخ في بطن الأرض

تحبل تنتشي

ماتختشي

من أي كائن موحشي

فوق ضهرها

وفي شهرها

تطلق وجعها وقهرها

تولد ربيع

فارس منيع

يفرش علي الكون المسافر

في الخريف والليل

يتونس  العاشق يسافر

في النهار والليل

ياليل