رئيس حزب الوفد

بهاء الدين أبو شقة

رئيس مجلس الإدارة

د.هانى سري الدين

رئيس التحرير

وجدي زين الدين

شباك علي الثورة

مطرح في بستان الأمل

احمد فؤاد نجم

الاثنين, 13 فبراير 2012 08:11
بقلم: أحمد فؤاد نجم

باستنظرك
باستنظرك
رغم القساوة في منظرك
لحظة هروبك يارباب
م الحب لما استنصرك
باستنظرك

***
باستنظرك رغم الشتا والبرد
والرعد  المخيف
باستنظرك
في الشارع المشغول
بأوحال الرصيف
أنا أصلي حاسب موعدك
وعارف اللي بيبعدك
أنا اللي خابر تبقي مين
وأنا اللي صابر
من سنين
وبأعد لك
بالثانية عمري
وأعد لك
مطرح في بستان الأمل
وبامد لك
وف كل خطوة
أمد لك
إيدي اللي شققها العمل
مدي الخطاوي ياحبيبتي
وقدمي
وان كنتي خايفة من الطريق
ابتسمي
ياشمس ياللي ضحكتك
قمر ينور سكتك
أنا اللي عشقك غرني
وانتي اللي عشقي بستانك
***
باستنظرك
باستنظرك
ياجرحي
ياحلمي العنيد
باستنظرك
باستنظرك
يامصر ياحبي الوحيد
وحتيجي يوم  وتصدقي
عشقي الأصيل
وتحققي
حلمي الجميل
وتزوقي
عمري اللي ضاع مستنظرك
باستنظرك
باستنظرك
باستنظرك
***
قال لي صديقي وابني الحبيب ميشيل غالي
ـ أنا شايف إن الدعوة لعصيان مدني غلط
قلت له:
- سيبهم يغلطوا ويتعلموا
قال:
ـ أليس في هذا خطر علي الثورة
قلت له:
- ما تخافش ع الثورة لانها الآن في حضن الشعب المصري والشعب المصري خلاص قرر إن الثورة لازم تتم.