رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شباك علي الثورة

شخصية مصونة

احمد فؤاد نجم

الأحد, 15 يناير 2012 09:33
بقلم: أحمد فؤاد نجم

قال عبده شمة:
ـ فكرك ياعم أحمد الولاد دول ع يقدروا ينفذوا اللي في راسهم وضحك أحمد القزعة قائلاً:
ـ أوباح دخلنا في الفوازير يافتاح ياعليم ع الصبح
وقال عبده شمة للقزعة:
ـ خبر ايه امال يا واكل أبوك انت مالك؟

فقال أحمد القزعة ضاحكاً
ـ مالي علي الله ياغيبوبة أنا بس عايز حد يترحم لي ياعم أحمد
ضحكت وقلت له:
ـ يترحم علي ايه ياقزعة ماهو الراجل بيتكلم عربي أهه.
فقال أحمد القزعة:
ـ طب خصيمك النبي ده عربي برضه؟ ولد مين اللي غيبوبة خايف لينفذوا اللي في دماغهم وإيه هو اللي في دماغهم؟ هي كلمات متقاطعة ولافوازير رمضان.
قلت لعبده شمة:
ـ اشرح له ياحاج عبده معلش
فقال عبده شمة
ـ وليه ماتشرحلوش انت ياعم أحمد؟
قلت للقزعة:
ـ الحاج عبده خايف من الإسلاميين ع الفن المصري مش برضه كده ياحاج عبده؟
فقال شمة:
ـ هو كده ياعم أحمد
فقال أحمد القزعة:
ـ طب وانت مالك ياغيبوبة بالفن المصري؟
فقال عبده شمة:
ـ مالي كيف يابجرة هو انا مش مصري؟
قال القزعة:
ـ تشرفنا ياعم المصري قول هات م الآخر.
فقال عبده شمة:
ـ البارحة ياعم أحمد سمعت الخطيب في صلاة الجمعة عم يجول «حيزبون في التسعين من عمرها وتقول خذني لحنانك خذني أخذك المولي وهو بك أولي».
قلت:
ـ وماذا كان رد فعل

المصلين.
قال:
ـ ضجوا بالضحك طبعاً.
قلت للقزعة:
ـ فهمت بقي الحاج عبده تقصد إيه؟
قال:
ـ بعد الترجمة الفورية اللي انت قدمتها دي فهمت دلوقتي بس لكن هو كان يقصد مين بالحيزبون.
قلت:
ـ الست أم كلثوم طبعاً.
فقال القزعة:
ـ طب ما انت ياعم أحمد كاتب فيها قصيدة «كلب الست»
قلت:
ـ قصيدة كلب الست مش مكتوبة في الست أم كلثوم ولكن مكتوبة في القانون اللي حول كلبها الي شخصية مصونة لا تمس لكن أم كلثوم نفسها في رأيي فلاحة مصرية عبقرية أدهشت العالم وفرضت عليه احترامها لدرجة انها تعد من أعظم عشر نساء في التاريخ الانساني.
فقال عبده شمة بدهشة:
ـ وي وي وي وي.
ثم قال للقزعة:
ـ فهمت يابجرة؟
وقال أحمد القزعة
ـ دي حدوتة زي حواديت ألف ليلة وليلة.
قلت:
ـ وأكتر وأعجب إن شاء الله حنحكي الحدوتة من طقطق لسلامو عليكو.