رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شباك علي الثورة

عمار يا مصر

احمد فؤاد نجم

الجمعة, 25 نوفمبر 2011 23:30
بقلم: أحمد فؤاد نجم

قلت له:
- يا أستاذ ابراهيم أنا باسألك مين اللي قبضوا عليه معاك بتقوللي كل الزملا اللي معاك في الشغل راح قايم واقف علي حيله فاتهيألي أنه نخلة وزعق.
- عمار يا مصر
وفوجئنا بفريد المخبر جاي من بره جري وقال:
- فيه إيه يا حاج بتزعق كدة ليه؟!

قال له بنفس الصوت العالي:
- باقول عمار يا مصر.
قال له:
- لأ هنا مافيش الكلام ده عمار يا مصر ولا خراب يا بنها.
قلت لفريد المخبر:
- خلاص بقي يا فريد صباحك ابيض.
فانصرف من حيث أتي فقلت للأستاذ ابراهيم:
- دول عاملين لكم قضية تنظيم بقي
قال لي:
- عليك نور.
قلت له:
- مسكوا معاكوا اسلحة.
قال بمنتهي الدهشة:
- أسلحة إيه فال الله ولا فالك
قلت له:
- أمال كنتوا حتقلبوا النظام بإيه؟
قال لي:
- نظام إيه اللي حنقلبه لا مؤاخذة.
قلت له:
- نظام البلد.
سكت شوية وبعدين قال لي:
- انت باين عليك مش فاهم حاجة خالص
قلت له:
- فهمني
قال لي:
- هي العبارة إيه؟
قلت له:
- أنا اللي باسألك هي العبارة إيه؟
قال لي:
- عبارة إيه؟
قلت له:
- مش انت بتقول إنكم تنظيم.
قال لي:
- أنا ما قلتش حاجة من أصله دول هما اللي بيقولوا
قلت له:
- هما مين؟
قال لي:
- ياعم افهم الله لا يسيئك العالم اللي جابوهم معايا نصهم بيطلع في الروح ونصهم بيشاور عقله.. وبعدين احنا مستعجلين علي إيه ما انت دلوقتي هتشوفهم.. دول يصعبوا ع الكافر..
قلت له:
- الكافر شيء يا استاذ ابراهيم ومباحث أمن الدولة شيء تاني فبالراحة علي وفهمني العبارة بالظبط؟
قال لي:
- مش أنت برضه حضرت النكسة زي كل المصريين.
قلت له:
- حصل