رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شامخ الشندويلى يكتب "خطوط ع الوشّ"

إبداع

الثلاثاء, 28 أغسطس 2012 12:44
شامخ الشندويلى يكتب خطوط ع الوشّكتبها الشاعر بمناسبة بلوغه الخمسين
شعر- شامخ الشندويلى

ليه الخطوط اللى ابتدت تظهر
ع الوش، دايماً ليها منحنيات؟
علشان تقول إن الحياة بتنحَنى
وكل حاجة رايحة للنهايات
...

أنا الزمن بيعدّى على وشى ..
وهّوّه بيعتَذر بحنان
وأنا أقول له : ليه..
سيب الحقيقة تبان
وهوّه فيه أجمل من الإنسان ،
وهوّه راحل من زمان ...لزمان؟
زى الفصول بعد الفصول مواعيد
والآية بعد الآية فى القرآن
ولا شِعر يقدر يوصف المعنى
ولا أى ريشة لعبقرى فنان
يارب يابديع السُنن ياجميل
أنا بين إيديك
مذنب
ضعيف
غلبان
لكن فهمت الحكمة وعرفتك
وراضى باللى تقوله مهما كان
القبر ضيق والحياة لحظات
والدنيا وهم كبير وبحر سراب
والناس بتتباهى بحاجات وحاجات
بس الحقيقة ان الجميع أغراب
أنا عمرى ما استعجلت على حاجة
غير بس إن الحق مايضيعشي
أنا ما انبهرتش من رنين وبريق
لأن آخرة كل حاجة تراب
ان كان دا كافى عشان انول رحمتك
إدينى بس أمارة طمنّى
قول للى دمع عيونه نازل سيل
طمعان فى عفوك:
"مطلبك مِنجاب"
قل للى خايف من حساب اِلّلاه
اذهب مسامحينك ياعبد اِلّلاه

أهم الاخبار