شامخ الشندويلى يكتب "الشعر طبطب على الشاعر"

الشعر طبطب على الشاعر

وقال له تهون

فجر الحقيقة البيضا بكره يبان

خللى فى قلبك بالحقيقة ايمان

بكرة اللى خانوا الحق يتندموا

واللى أعان المجرمين يتهان

وف كل عركة ومعركة خونة

وف كل عركة ومعركة شُجعان

دانت اللى قارى التاريخ

بدروسُه وبعبرُه

وفيها آخرة كل ندل جبان

بلدك شديدة وصبرها قوة

بلدك قوية ونجمها انسان

وقت اللزوم يظهر

يشق الليل

يفرِق مابين الحق والبهتان

شعبك مابتليقش الهزيمة عليه

بلدك مابيليقشى عليها هوان

تتعب وتعيا وتبتعد وتغيب

وتقوم عفيّة تنفّض الأحزان

الأرض دى مَرْسَى سلام وضمير

الأرض دى عيادة شفا وِحنان

قول للشباب الورد فى الميادين

جاىّ المطر على زرعكم ضاحك

وسنانُه لولى من الفرح باينين

هوّه اللى سهر الليل على ثورته

زى اللى نايم فى المذلّة سنين؟

قول للشجاع انت الأكيد كسبان

وطول مالبلادك عيال واعيين

لا تخاف عليها ولا تِبات قلقان

الناس خلاص عرفت طريق بكرة

وفهموا معنى انك تكون

انسان