"ضحكة شهيد"
ضحك الشهيد في الميدان نفسه في لقا ربه
وشاف بعينه الجنان والنهر تحتيها
الله عليك يا ولد بالدم تحميها
وأمانة يا أمه ما تحزني عليا وتنوحي
لفيني يا أمه في العلم .روحي فدا وطني
أنا كنت واقف باسمعه .قلبي عليك يا شهيد
تتلف جوه العلم وكأنه لبس العيد
فرحان بصحوة وطن تعب وتعبه شديد
الله أكبر في الميدان .صوت الأذان حاضن جرس
جوه الميدان صوت التحام أحمد وحنا ومصطفي
بصيت في عينهم كلهم حب الوطن قايد لهب
الميم مصيرنا نغيره والصاد صورنا في الميدان
والره رواية للتاريخ ياخد عبر
وهقوله اسمع يا تاريخ. أنا مهما هستحمل واسكت
هييجي يوم وهنفجر .هاصرخ وأكسر الحجر
آه يانا منك يا بلد حبك يشيب ليه الولد
يكبر سنين من غير عدد في عيون ولاد كل البلد
مع إنه مش موجود هنا..لكن شهيد
تفضل عمايله في قلبنا يبقاله عيد
يا ريت يا مصر كنت انا هو الشهيد
من غير نفاق من غير غُنا نفسي أموت
أموت دفاع عن مصرنا "ادعوا معايا ربنا أموت شهيد"