مريم توفيق تكتب "أم الشهيد"

إبداع

الثلاثاء, 05 يونيو 2012 16:04
مريم توفيق تكتب أم الشهيد
قصيدة للشاعرة – مريم توفيق :

أم الشهيد
إيزيس أنتى

وولادة رجال أبطال
بيدوا مصر أرواحهم
ويفدوها فى كل مجال
وتبكى ياغالية من دمعك يفيض النيل
وأحزانك على ولادك
تطلع فجر يمحى الليل
ياصابرة والتاريخ شاهد
وصامدة والوجع جامد
ودم ولادك الشهدا
على أرض الوطن ساجد
بيتوضى وبيرتل من الإنجيل وم القرآن
آيات الرحمة والغفران
على مينا وشيخنا عماد
وملهم ثورته خالد
على اللى دمهم واحد
على ولادك يا أم الخير ياولادة
وانتى يا أم كل شهيد
بدمه هل فجر العيد
وفضلك كل يوم بيزيد
ياوارثة فى الأمومة إيزيس
بتولد كل يوم حورس
ويرضع من لبنها الحر وطنية وقومية
ويتربى على أخلاق وحرية
ياأعظم ست فى الدنيا يامصرية
تعيشى وتولدى لينا كمان شهدا
كمان شعرا كمان علما كمان ثوار
يخوضوا النار كمان أحرار كمان أبرار
يعيدوا لمصر أمجادها
ويحيوا ذكرى كل شهيد

أهم الاخبار