رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

الشندويلي لمبارك: متأسفين ياريّس!

إبداع

الخميس, 03 مارس 2011 12:11
خاص- بوابة الوفد:


بعد أن نجحت ثورة 25 يناير في إسقاط الرئيس مبارك ونظامه ظهرت بعض الأصوات التي تنادي بتقديم اعتذار للرئيس مبارك عن إجباره على التنحي عن الحكم معللين ذلك بتاريخه العظيم وإنجازاته وأفضاله التي قدمها لمصر على مدار 30 عاما؛ وكان منشأ تلك الدعوات بعض الجروبات على صفحات الفيس بوك.
الكاتب والشاعر شامخ الشندويلي قرر أن يسخر من تلك الدعوات المطالبة بتقديم اعتذار للرئيس من خلال قصيدته الأخيرة "متأسفين يا ريس" التي يوضح من

خلال كلماتها الأسباب التي ستجعلنا نقدم الاعتذار له.

متأسفين ياريّس

 

متأسفين ياريّس

إحنا اللى جُرنا عليك

متأسفين إننا

إحنا اللى عذّبناك

وإحنا اللى ضيّعناك

وأنت اللى هنت علينا

ولاهُنّا مرة عليك

وإحنا اللى سِبنا الكلاب..

الضالّة تنهش فيك

الشعب دا كان عصابة ..

م المجرمين حواليك

الشعب خان الأمانة

ورماك بكل إهانة

وبعد تضحيّاتك...

آخرتها تف عليك

 

وكنت شخص نزيه

الأمّة تفخر بيه

وكنت ماشى سليم

متأسفين يازعيم

غرقتنا فى الخير

غطّستنا فى العز

وتمللى صاحب الفضل

ع النفس مابيلذّ

وأنت اللى مضرب مثال

فى الصبر والاحتمال

وكنّا بنبهدلك

عمّال على بطّال

بجد زهّقناك..

بجد هزّأناك

حتى صوابع إيدينا ..

معلمين فى قفاك

وكنّا بنلاقى متعة

فى عكننتنا عليك

وكنت أب عظيم

عمرك ماكنت لئيم

وكنت حضن حنان

والشعب أصلُه يتيم

بس أنت كان غلطتك..

إنك عطفت عليه

والشعب دا نمرود

ولا شىء بيتمر فيه

باعك وباع عشرتك ..

بالنت والفيس بوك

وأنت اللى مالى جيوبه ..

بالمال وحاشى البوكّ

عيّشتنا فى نعيم..

ركّبتنا التوك توك

وكان نتيجة الدلع..

الشعب كله اتمرع

من كتر دلعك فسد

القلب قبل الجسد

الشعب دا كان فار

عمّال يعض ف أسد

تبّت يدا الكفار

بحق سورة المسد


الشعب دا كان عميل

للأمريكان بيميل

وكان صديق اليهود

وكان حبيب إسرائيل

يخون ويقبض فلوس

يحطّها ف براميل

وكان له ويّا الخيانة

ومع الفساد مواويل

وأنت اللى صابر عليه

يازعيم وصبرك طويل

الشعب دا جوّعك

ولبسك هلاهيل

جبنالك الأمراض

ضيّعنا مستقبلك

هلك اللى ضيّع بلادُه

وخان ضميرُه هلك.

أهم الاخبار