إزاي اشتغل مع ابني على المجموعات الضمنية؟

شرح هشام سليمان أخصائي تخاطب، كيفية التعامل مع الطفل على المجموعات الضمنية قائلا: أولا بالنسبة للنطق بننطق بلغة ولهجة بلد الطفل بمعنى أنه في حالة أن يكون مصري الجنسية فلا ننطق فم وأنف ونقول "بؤ ومناخير" عادي، أما لو لهجته تقال هكذا فلا توجد مشكلة، وكذلك برتقالة مثلا العامي المصري مش بننطق (ق) بنقولها برتئانه مثلا.

وأضاف: بالنسبة للكروت تكون من غير مشتتات وصورة واضحة خلفية بيضاء وصورة الشئ طبيعي مش كرتون أو رسم ويفضل نشتغل بمجسمات في البداية. 

في حالة أن يكون إدراك الطفل قليل ماذا نقول وكيف  نستخدمهم؟،  مثلا ( طماطم أو أوطه) لا نظل نقول أوطه دي أوطه أوطه،  بل نقول للطفل "بص دي اوطه ويمسكها بايده ويحسها ، دي اوطه لونها احمر بص أوطه شكلها ايه شكلها مدور خد أوطه هات اوطه اعمل ايه باوطه؟"  اقطع ونمثل حركة تقطيع بأيدينا ونمسك أيد الطفل ويمثل كأنه يقطع،  وبذلك أكون اشتغلت على مهارة التقليد وأنمي اللغة عند الطفل، واستكمل مع الطفل اعمل ايه تاني باوطه؟ اكل واعمل اني باكل واحرك فمي ونرجع نعيد تاني دي أيه اوطه خد اوطه هات اوطه و ممكن نخبي الاوطه في هدومه ونقوله فين أوطه؟ ونبدأ ندور عليها ونطلعها ونقوله أهي اوطه ونشاور عليها دي اوطه وبعدين نجيب 2 اوطه نبدأ نشتغل على الإدراك البصري مطابقة مجسم بمجسم ونقوله هات زي أوطه ونحطها علي ترابيزه ونقوله حط أوطه مع اللي زيها ويحط أوطه جنب اوطه وهكذا في باقي عناصر المجموعات الضمنية. 

وأضاف أخصائي التخاطب: نتوجه إلى المواصلات نغعل نفس الموضوع مثلا (عربيه) بص عربيه ... عربيه بتمشي... عربيه بتعمل صوت إيه؟ بيب بيب.. خد عربيه هات عربيه بص عربيه تمشي يلا أعمل زيي مشي عربيه.. عربيه بتعمل صوت بيب بيب اعمل صوت عربيه بيب بيب عربيه لونها إيه؟ لونها احمر ونشتغل ادراك بصري مطابقة مجسم بمجسم حط عربيه مع اللي زيها .
وتابع: نذهب للحيوانات نفعل نفس الخطوات مثلا (قطه) بص قطه.. ايه دي ؟ قطه .. قطه تعمل صوت ( ميو ميو ) بص قطه تمشي ازاي خد قطه هات قطه و نخبي قطه و يدور عليها و يطلعها و نقوله اهي قطه دي قطه .. قطه بتعيش فين ؟ قطه بتعيش في البيت و الشارع ... و برضه نشتغل ادراك بصري مجسم بمجسم او صوره بصوره و نقول حط قطه مع قطه زيها.

 

وشدد"هشام" على نقطه هامه جداً وهي أن "يكون العمل على المجموعات الضمنيه كلها مع بعض مش هنخلص مجموعه و ندخل في اللي بعدها بمعني مثلا هناخد عنصرين من اجزاء الجسم و عنصرين من الطيور و عنصرين من المواصلات و عنصرين من الحيوانات و نشتغل لحد ما يتعرف عليهم"

وتابع: ومن الاسئله المهمه هبدأ شغلي على اى مجموعه من المجموعات الضمنية؟ مهم جدا اني اشتغل على المجموعات اللي بتطلع صوت عشان بتكون محفزه اكتر للطفل انه يقلد صوت بطه او قطه او عربيه او كلب أو قطر

ترتيب المجموعات الضمنية

مجموعة اجزاء الجسم ( ايد - بؤ – عين

– شعر)
مجموعة الحيوانات الاليفه ( قطه – كلب – خروف – بقره – حصان )
مجموعة المواصلات ( عربيه – طياره – قطر – مركب )
مجموعة الطيور ( بطه – فرخه – عصفوره – حمامه )
مجموعة الحيوانات الغير آليفة ( اسد – فيل – زرافه – قرد )
مجموعة الفواكه ( موزه – تفاحه – عنب – برتقاله )
مجموعة الخضروات ( اوطه "طماطم" – خيار – جزر – بطاطس )
مجموعة الملابس ( بنطالون – جزمه – كوتشي – تي شيرت – شراب – فستان )
مجموعة ادوات المائده ( كوبايه – طبق – معلقه – شوكه – سكينه )
مجموعة الادوات العامه ( موبايل – فرشه – مشط – فرشة اسنان – ساعه – نضاره – مفتاح )
مجموعة الاثاث ( سرير – كرسي – ترابيزه – دولاب )
مجموعة المشروبات ( مايه – لبن – عصير – شاي )
مجموعة الطعام ( عيش – بيضه – جبنه – فول – طعميه )
مجموعة أفعال ( اكل – اشرب – انام – اسرح – اقوم – اقعد – اطلع – انزل – اغسل – البس – اقطع – اقشر – افتح – اقفل – اخرج - ادخل )

ترتيب المجموعات

من بعد مجموعة الخضروات ممكن يتم تغيير الترتيب حسب الاستخدام في البيئه او الاقرب للطفل في حياته اليوميه اما مجموعة الافعال فهي مشتركه و اساسيه مع كل مجموعه يتم استخدام الافعال المناسبه عشان زيادة المحصول اللغوي و زيادة طول الجمله بعد التعرف و تسمية المجموعات الضمنيه بننتقل لمرحلة الكلمه الجمله و بعدها الجمل من كلمتين.
واختتم: مهم جدا اني انطق الكلمه كامله بدون تقسيم مقاطع في بداية شغلي مع الطفل عشان يكتسبها كامله و نتكلم بصوت واضح و برتم بطئ مش بطريقه سريعه محدش بيجري ورانا و الصوت الواضح مش معناه اننا نزعق لا هنتكلم بصوت قوي و بلاش ننغم الكلام بشكل مبالغ فيه احنا اه بننغم بس بشكل بسيط عشان ميكنش فيه رتابه في ادائك مع الطفل.